မြန်မာနိုင်ငံမှ အိမ်ထောင်စုတစ်စုအတွက် အခြေခံစားသောက်ကုန်များပါဝင်သော ဈေးခြင်းတစ်ခြင်း၏ ကုန်ကျစရိတ်မှာ ကျပ် ၅၁,၁၈၇ အထိရှိလာပြီး ၂၀ ရာခိုင်နှုန်း မြင့်တက်လာဟု WFP သတိပေး
ရန်ကုန်၊ ဇူလိုင် ၂၈
မြန်မာနိုင်ငံမှ အိမ်ထောင်စုတစ်စုအတွက် အခြေခံစားသောက်ကုန်များပါဝင်သော ဈေးခြင်းတစ်ခြင်း၏ ကုန်ကျစရိတ်မှာ ကျပ် ၅၁,၁၈၇ အထိရှိလာပြီး ၂၀ ရာခိုင်နှုန်း မြင့်တက်လာကြောင်း ကမ္ဘာ့စားနပ်ရိက္ခာအစီအစဉ် (WFP)က သတိပေးသည်။
ကမ္ဘာ့စားနပ်ရိက္ခာအစီအစဉ် (WFP) က ထုတ်ပြန်သည့် Myanmar Market Monitor – June 2026 အစီရင်ခံစာအရ မြန်မာနိုင်ငံတွင် အိမ်ထောင်စုတစ်စုအတွက် အခြေခံစား သောက်ကုန်များပါဝင်သော ဈေးခြင်းတစ်ခြင်း၏ ကုန်ကျစရိတ်သည် ကျပ် ၅၁,၁၈၇ အထိ ရှိလာပြီး ဖေဖော်ဝါရီလ နောက်ဆုံးပတ်နှင့် နှိုင်းယှဉ်ပါက ၂၀ ရာခိုင်နှုန်း မြင့်တက်လာကြောင်း သိရသည်။
ယင်းသို့ ဈေးနှုန်းများ မြင့်တက်လာခြင်း၏ အဓိကအကြောင်းရင်းမှာ စက်သုံးဆီပြတ်လပ်မှုကြောင့် သယ်ယူပို့ဆောင်ရေးစရိတ်များ ဆက်လက်မြင့်မားနေခြင်းဖြစ်ကြောင်း WFP က သတိပေးထားသည်။
အစီရင်ခံစာအရ ၂၀၂၆ ခုနှစ် ဇူလိုင်လ ၃ ရက်အထိ အခြေခံစားသောက်ကုန်ဈေးခြင်း (Food Basket)၏ ပျှမ်းမျှ ကုန်ကျစရိတ်သည် ဖေဖော်ဝါရီလ နောက်ဆုံးပတ်ထက် ၂၀ ရာခိုင်နှုန်း မြင့်တက်ခဲ့ပြီး၊ ဇွန်လတစ်လအတွင်းမှာပင် ယခင်လထက် ၂ ရာခိုင်နှုန်း ထပ်မံမြင့်တက်ကာ ပျမ်းမျှ ကျပ် ၅၁,၁၈၇ အထိ ရောက်ရှိလာခြင်းဖြစ်သည်။
WFP က စက်သုံးဆီပြတ်လပ်မှုကြောင့် ကုန်စည်သယ်ယူပို့ဆောင်ရေးစရိတ်များ မြင့်တက်နေခြင်းသည် အိမ်ထောင်စုများ၏ အစားအသောက်ကုန်ကျစရိတ် မြင့်မားလာစေသည့် အဓိကအကြောင်းရင်းအဖြစ် ဆက်လက်တည်ရှိနေကြောင်း ထောက်ပြထားသည်။
ဇွန်လအတွင်း ဒီဇယ်ဆီဈေးနှုန်းများ အနည်းငယ် ပြန်လည်ကျဆင်းခဲ့သော်လည်း စစ်မတိုင်မီကာလနှင့် နှိုင်းယှဉ်ပါက တစ်နိုင်ငံလုံးအတိုင်းအတာဖြင့် ပျမ်းမျှ ၄၅ ရာခိုင်နှုန်း မြင့်မားနေဆဲဖြစ်ကြောင်း WP ၏အစီရင်ခံစာက ဆိုသည်။
ပဋိပက္ခဖြစ်ပွားနေသည့် ဒေသများတွင် စက်သုံးဆီဈေးနှုန်းများမှာ ပိုမိုမြင့်မားနေပြီး ရခိုင်ပြည်နယ် စစ်တွေမြို့တွင် ဒီဇယ်တစ်လီတာ ကျပ် ၁၁,၀၀၀ ခန့်နှင့် ကချင်ပြည်နယ် မြစ်ကြီးနားမြို့တွင် ကျပ် ၁၂,၅၀၀ ခန့်အထိ ရှိနေကာ စစ်မတိုင်မီ ရန်ကုန်မြို့ရှိ ဒီဇယ်ဈေးနှုန်းထက် ၅ ဆနီးပါး မြင့်တက်နေကြောင်း သိရှိရသည်။
ထို့ပြင် ရာသီအလိုက် ဈေးကွက်အတွင်း ကုန်ပစ္စည်းဝင်ရောက်မှု လျော့နည်းလာခြင်းကြောင့် ရခိုင်ပြည်နယ်အလယ်ပိုင်းတွင် ခရမ်းချဉ်သီးဈေးနှုန်း သိသိသာသာ မြင့်တက်ခဲ့ပြီး အခြားဒေသများတွင်လည်း အနည်းငယ် မြင့်တက်ခဲ့ကြောင်း သိရသည်။
ဆန်၊ ကုလားပဲ၊ ဆားနှင့် ကြက်သွန်နီကဲ့သို့ အခြေခံစားသောက်ကုန်များ၏ ဈေးနှုန်းများလည်း ဒေသအချို့တွင် ဆက်လက်မြင့်တက်ခဲ့သည်။ အဆိုပါ ဈေးနှုန်းမြင့်တက်မှုများမှာ ကုန်စည်ထောက်ပံ့ရေးလမ်းကြောင်းများ အနှောင့်အယှက်ဖြစ်နေခြင်း၊ သယ်ယူပို့ဆောင်ရေးစရိတ် မြင့်မားခြင်း၊ ရာသီအလိုက် ထုတ်လုပ်မှုအပြောင်းအလဲများနှင့် နိုင်ငံတစ်ဝန်း ပဋိပက္ခများကြောင့် ဈေးကွက်မတည်ငြိမ်မှုများ ဖြစ်ပေါ်နေခြင်းတို့ကြောင့်ဖြစ်ကြောင်း WFP က ကုန်သည်များ၏ ပြောကြားချက်ကို ကိုးကား၍ ထုတဖော်ပြောဆိုထားသည်။
တစ်ဖက်တွင် ဈေးကွက်အတွင်း ကြက်ဥထောက်ပံ့မှု ပိုမိုကောင်းမွန်လာခြင်းကြောင့် ဇွန်လအတွင်း ကြက်ဥဈေးနှုန်းများမှာ မေလထက် ကျဆင်းခဲ့ကြောင်း သိရသည်။
ပြည်သူများ၏ ဝယ်ယူနိုင်စွမ်း လျော့ကျလာခြင်းကြောင့် ဝယ်လိုအားလည်း လျော့နည်းခဲ့ပြီး ယင်းအချက်က ကြက်ဥဈေးနှုန်းများ ကျဆင်းလာစေရန် အထောက်အကူဖြစ်စေခဲ့ကြောင်း WFP က သုံးသပ်ထားသည်။
သို့သော် ပဋိပက္ခပြင်းထန်နေသည့် ရှမ်းပြည်နယ်မြောက်ပိုင်းတွင် လမ်းပန်းဆက်သွယ်ရေး အခက်အခဲများ ဆက်လက်ရှိနေသဖြင့် ကြက်ဥထောက်ပံ့မှု အကန့်အသတ်ရှိနေကာ ဈေးနှုန်းများမှာ မြင့်မားနေဆဲဖြစ်ကြောင်း WFP ၏ အစီရင်ခံစာက ဆိုသည်။