Ijtimoiy tarmoqlarda tarqalgan holat yuzasidan quyidagilar ma’lum qilinadi
Shahrisabz tuman hokimligi fuqarolarning uy-joy daxlsizligi, shaxsiy hayoti, sha’ni va qadr-qimmati Konstitutsiya bilan kafolatlangan huquqlar ekanini to‘liq e’tirof etadi hamda barcha xizmat faoliyati qonunchilik doirasida amalga oshirilishini ta’kidlaydi.
Shahrisabz tumanidagi 53 ta mahallada keng ko‘lamli obodonlashtirish ishlari amalga oshirildi. Jumladan, davlat dasturlari doirasida 85 ta aholi yashash punktlarida 758 mlrd so‘mlik ishlar bajarilmoqda. Bundan tashqari, tuman hokimligi, MFY hamda aholi bilan hamkorlikda hashar yo’li orqali 220 km hudud obodonlashtirildi, 210 km ariq va lotok tozalandi, 70 km ichki yo‘l asfaltlandi, 32 ta transformator va 406 ta beton ustun o‘rnatildi.
Shuningdek, 93 ta qishloqda qabristonlar, ziyoratgohlar va umumiy jamoat joylarida keng ko‘lamli obodonlashtirish ishlari amalga oshirilib, hududlar tozalandi, tartibga keltirildi va ko‘kalamzorlashtirildi.
Mazkur ishlarni davom ettirish maqsadida “Dolzarb 40 kunlik” tadbirlari doirasida mahallalarda obodonlashtirish, sanitariya holatini o‘rganish hamda ehtiyojmand, nogironligi bo‘lgan va yordamga muhtoj fuqarolar holidan xabar olish ishlari olib borildi.
Tuman hokimi “Shamaton” mahallasida o‘rganishlar davomida yo‘l bo‘yida joylashgan, tashqi ko‘rinishi qarovsiz holatdagi xonadonga e’tibor qaratgan. Mahalla raisidan ushbu uyda kim yashashi so‘ralganda, u yerda nogironligi bo‘lgan keksa er-xotinlar istiqomat qilishi ma’lum qilingan.
Fuqarolarning holidan xabar olish va muammolarini o‘rganish maqsadida xonadonga tashrif buyurilgan. Biroq, yonma-yon joylashgan va darvozalari bir joyda bo‘lganligi sababli mahalla raisi tomonidan xonadonlar darvozasi adashib ko‘rsatilgan. Natijada dastlab boshqa xonadonga kirilgan.
Xonadonga kirishdan oldin uy egalaridan ruxsat olingan. Mahalla raisining hisobotiga ko’ra, xonadon egalari mehnat faoliyati bilan shug‘ullanishi, nogironligi mavjud emasligi, o‘z mablag‘lari hisobidan yangi uy qurganliklari hamda ehtiyojmand oilalar toifasiga kirmasliklarini bildirgan.
Shundan so‘ng tuman hokimi tomonidan xonadonning ko’cha qismi atrofi ozodaligini saqlash va tomorqadan unumli foydalanish bo‘yicha tavsiya hamda tushuntirishlar berilgan.
Keyinchalik asl tashrif rejalashtirilgan nogironligi bo‘lgan fuqaro istiqomat qilayotgan xonadonga borilgan. O‘rganish davomida ushbu xonadon namunali tarzda saqlanayotgani, tomorqadan unumli foydalanayotgani aniqlangan.
Shuningdek, fuqaroga davlat tomonidan nogironlik nafaqasi tayinlangani, yashash sharoitini yaxshilash maqsadida uyi hokimlik tashabbusi bilan hashar yo‘li orqali ta’mirlangani hamda Ramazon oyida homiylik asosida iftorlik tadbiri tashkil etilgani ma’lum bo‘lgan.
Mazkur videotasvirlar tuman hokimligi matbuot xizmati tomonidan olinmagan va rasmiy sahifalarda tarqatilmagan. Ushbu video mahalla “yettilik” vakillari tomonidan tasvirga olinib, tuman hokimligining rasmiy kanallariga emas, balki ehtiyotsizlik tufayli ishchi guruhning ichki muloqot guruhiga yuborilgan.
Shuningdek, tuman hokimi tomonidan bunday videotasvirlarni ijtimoiy tarmoqlarga joylashtirmaslik bo‘yicha qat’iy ko‘rsatma berilgan.
Yuzaga kelgan holat yuzasidan xizmat tahlili o‘tkazilib, kelgusida shunga o‘xshash vaziyatlarning oldini olish bo‘yicha tashkiliy choralar ko‘rilmoqda.
Xulosa qilib aytganda, yuzaga kelgan tushunmovchilik mahalla raisi tomonidan xonadonlar yanglish ko‘rsatilgani bilan bog‘liq bo‘lib, hech qanday fuqaroni kamsitish yoki uning shaxsiy daxlsizligini buzish maqsadi ko‘zlanmagan. Asosiy maqsad xonadonlar obodligi, mahalla ko’chalari tozaligi va tomorqalardan unumli foydalanishni samarali yo’lga qo’yish nazarda tutilgan.
Holat ijobiy maqsadda, ya’ni aholining moddiy va madaniy manfaatlariga xizmat qilishga qaratilganligiga urg’u berilgan bo’lib, voqeani noto‘g‘ri talqin qilmaslik, voqeaga xolisona yondashish so‘raladi.
📱https://t.me/Shahrisabz_tuman_hokimligi
📱Gov.uz📱Facebook📱Youtube📱 Instagram📱 X
